O le matou manulautī, o le faamautinoa lea o loo mafai pea ona maua e tinā i le va o le 45 ma le 69 tausaga, le auaunaga o le faia fua o fā'ata o le susu (mammogram) ma ia sologa lelei le faasee atu i le auaunaga fou.

Pe afai o loo iai ni ou popolega i le mālōlōina lelei o ou susu, aua e te faatali mo le isi au fā'ata o le susu - ia vaai lau foma'i i le vave e mafai ai.

Fesili ma tali

O le isi a'u fā'ata o le susu o loo sosoo e fai iā Fepuari poo Mati. Pe mafai ona ou tago a'u e faatonu so'u avanoa?

Faamolemole vili le BreastScreen Aotearoa i le 0800 270 200. O le a matou faamautinoa faamaumauga e faafesoota'i ai oe ma o le a faafesoota'i atu oe e se tasi pe a oo ina tatala faasologa o avanoa e fai ai fā'ata o le susu.

O afea o le a fesoota'i mai ai se tasi?

E faatalitalia o le a matou faafesoota'i atu oe iā Mati 2021.

Aiseā e tatau ai ona ou faatali?/Aiseā e lē mafai ai ona ou tago a'u e faatonu so'u avanoa?

O le nofoaga fou lea ua faatulaga ai nei auaunaga mo fā'ata o le susu i Aukilani tutotonu, o le 308 Great South Road, Greenlane (i autafa o le Countdown). O le taimi lava e mafai ai ona faaaogā le fale, o le a faafesoota'i atu loa oe e se tasi o le 'aufaigaluega. Ae mo le taimi nei, pe afai o loo iai ni ou popolega i le mālōlōina lelei o ou susu, aua e te faatali mo le isi au fā'ata o le susu - ia vaai lau foma'i i le vave e mafai ai.

Aiseā o le a sui ai le nofoaga e siitia i ai le auaunaga o fā'ata o le susu mo tinā o loo i Aukilani tutotonu?

Talu ai ona o le kamupanī o loo faia fua i le taimi nei le auaunaga o le fā'ata o le susu mo le BreastScreen Aotearoa i Aukilani tutotonu, o le BreastScreen Auckland Ltd (BSAL), ua latou faailoa atu i le Matagaluega o le Soifua Mālōlōina, o le a mae'a le latou konekarate i le aso 28 o Fepuari 2021. O le kamupanī fou e ta'ua o le BreastScreen Auckland Central (BSAC) e amata lana auaunaga iā Mati 2021.

O fea o le a ou alu i ai e fai ai la'u fā'ata o le susu e amata atu iā Mati?

O le a iai le falema'i fou i le 308 Great South Road, Greenlane (i autafa o le Countdown). O le a fesoota'i atu le auaunaga fou ma nisi faamatalaga, pe a latalata i le taimi o lau fā'ata ma toe faamautinoa ai le taimi na faatonu mo oe. O le a lolomi atu le faasologa o nofoaga o le a faatū ai le tatou falema'i feavea'i i le Clinic locations/Auckland.

O lea e faatali se tali mai o la'u fā'ata - o fea ou te alu i ai?

Pe afai sa faatonu lou avanoa e iloa ai le tali o lau fā'ata ina ua mae'a ona fai fua lau fā'ata o le susu e le BreastScreen Aotearoa, i le falema'i i St Mark's Road i Remuera, faamolemole ia auai pea e pei ona faatulagaina.

Pe o le a mafai pea ona faia fua la'u fā'ata o le susu e le BreastScreen Aotearoa i Aukilani tutotonu?

Ioe, o le a mafai lava ona faia fua le fā'ata o le susu mo tinā o loo alala i Aukilani tutotonu e le BreastScreen Auckland Central. O le nofoaga fou o le a iai o le 308 Great South Road, Greenlane (i autafa o le Countdown).

O lea ou te popole i se suiga i o'u susu, o le ā e tatau ona ou faia?

Pe afai o loo iai ni ou popolega i le mālōlōina lelei o ou susu, aua e te faatali mo le isi au fā'ata o le susu - ia vaai lau foma'i i le vave e mafai ai.

O lea ua lata i le taimi e fai fua ai la'u fā'ata o le susu e le BreastScreen Aotearoa i le falema'i/falema'i feavea'i i St Mark's Rd, o le ā e tatau ona ou faia?

Faamolemole vili le BreastScreen Aotearoa i le 0800 270 200. O le a matou faamautinoa faamaumauga e faafesoota'i ai oe ma o le a faafesoota'i atu oe e se tasi pe a oo ina tatala faasologa o avanoa e fai ai fā'ata o le susu.

Ou te nofo i Aukilani tutotonu, pe o lona uiga la o le a ou alu i North Shore poo Waitakere e fai fua ai la'u fā'ata o le susu?

E leai, o le a faaauau pea le auaunaga e faia fua ai le fā'ata o le BreastScreen Aotearoa i Aukilani tutotonu mo tinā o loo alala ai iinā. O le tuatusi o le auaunaga fou o le 308 Great South Road, Greenlane (i autafa o le Countdown).

E to'afia tinā o le a aafia i lenei suiga?

E pe ā ma le 67,000 tinā i Aukilani tutotonu i le va o le 45 ma le 69 tausaga le matutua e agavaa mo le fā'ata o le susu

Pe o le a aafia le lelei o le auaunaga pe a sui le kamupanī o le a faia?

O loo ave le faamuamua ina ia faaauau ona saunia se auaunaga e sili ona lelei mo le fā'ataina o susu o tinā ma ia sologa lelei le faasee atu i le isi auaunaga.

O le ā le lamatiaga i se tinā pe afai e toe tolopō lana fā'ata o le susu?

E ave la matou faamuamua i lou saogalemu ma o le a iloiloina ma le mae'ae'a lou tulaga a o faamautūina avanoa e faia ai lou fā'ata a o faagasolo lenei fetuuna'iga. Ae mo le taimi nei, pe afai o loo iai ni ou popolega i le mālōlōina lelei o ou susu, aua e te faatali mo le isi au fā'ata o le susu – ia vaai lau foma'i i le vave e mafai ai.